പൂനെ ഫിലിം ഇൻസ്റ്റിറ്റ്യൂട്ടിന്റെ പ്രസിഡന്റായി നടൻ ആർ മാധവനെ നിയമിച്ചിരിക്കുകയാണ് കേന്ദ്രസർക്കാർ. ഗവേണിംഗ് കൗൺസിൽ ചെയർമാനായും മാധവനെത്തന്നെയാണ് ഇൻഫർമേഷൻ ആൻഡ് ബ്രോഡ്കാസ്റ്റിംഗ് മന്ത്രാലയം നിയമിച്ചിരിക്കുന്നത്.
മുൻ പ്രസിഡന്റായ ശേഖർ കപൂറിന്റെ കാലാവധി 2023 മാർച്ച് 3 ന് അവസാനിച്ചിരുന്നു. വെള്ളിയാഴ്ച്ച പുറപ്പെടുവിച്ച ഈ തീരുമാനം, മന്ത്രാലയം തങ്ങളെ അറിയിക്കുകയായിരുന്നെന്ന് എഫ്ടിഐഐ രജിസ്ട്രാർ സയ്യിദ് റബീഹാഷ്മി പറഞ്ഞു.
Heartiest congratulations to @ActorMadhavan ji on being nominated as President of @FTIIOfficial and Chairman of the governing council.
I’m sure that your vast experience & strong ethics will enrich this institute, bring positive changes, & take it to a higher level. My best…
— Anurag Thakur (@ianuragthakur) September 1, 2023
പുതിയ പ്രസിഡന്റായ മാധവനെ കേന്ദ്രമന്ത്രി അനുരാഗ് താക്കൂർ സമൂഹ മാധ്യമമായ എക്സിലൂടെ അഭിനന്ദിച്ചിരുന്നു. അദ്ദേഹത്തിൻറെ അനുഭവസമ്പത്തും, പരിചയവും ഉപയോഗിച്ച് സ്ഥാപനത്തിൽ പുതിയ മാറ്റങ്ങൾ കൊണ്ടുവരുമെന്ന് അദ്ദേഹം പ്രത്യാശ പ്രകടിപ്പിച്ചിട്ടുണ്ട്. അദ്ദേഹത്തിന്റെ പോസ്റ്റ് ഉൾപ്പെടുത്തിക്കൊണ്ട് അഭിനന്ദനങ്ങൾക്ക് നന്ദിയെന്നും താങ്കളുടെ പ്രതീക്ഷയ്ക്കൊത്ത് കാര്യങ്ങൾ ചെയ്യാൻ കഴിയുന്നപോലെയെല്ലാം ശ്രമിക്കാമെന്നും മാധവൻ പറഞ്ഞു.
Thank you so very much for the honor and kind wishes @ianuragthakur Ji. I will do my very best to live up to all the expectations. 🙏🙏 https://t.co/OHCKDS9cqt
— Ranganathan Madhavan (@ActorMadhavan) September 1, 2023
ഐ.എസ്.ആർ.ഒ ശാസ്ത്രഞ്ജനായിരുന്ന നമ്പി നാരായണന്റെ ജീവിതം ആസ്പദമാക്കി ഒരുക്കിയ ചിത്രമായ ‘റോക്കട്രി: ദി നമ്പി എഫക്റ്റ്’ എന്ന സിനിമയ്ക്ക് മികച്ച അഭിപ്രായമാണ് പ്രേക്ഷകരിൽ നിന്നുണ്ടായത്. ഈ സിനിമയ്ക്ക് ദേശീയ ചലച്ചിത്ര പുരസ്കാരം ലഭിച്ചിരുന്നു. മികച്ച ചിത്രത്തിനുള്ള പുരസ്കാരമാണ് ചിത്രം സ്വന്തമാക്കിയത്. മാധവൻ ആയിരുന്നു ചിത്രത്തിന് രചനയും സംവിധാനവും നിർവഹിച്ചത്. കൂടാതെ അദ്ദേഹം തന്നെയാണ് ചിത്രത്തിൽ നമ്പി നാരായണന്റെ വേഷത്തിൽ പ്രത്യക്ഷപ്പെട്ടത്. നമ്പി നാരായണന്റെ 27 വയസ്സു മുതൽ 70 വയസ്സു വരെയുള്ള കാലഘട്ടമാണ് ഈ സിനിമയുടെ പശ്ചാത്തലം. വിവിധ പ്രായത്തിലുള്ള നമ്പി നാരായണനെ അവതരിപ്പിക്കുന്നതിനായി മാധവൻ നടത്തിയ ശാരീരിക മാറ്റങ്ങളും, മേക്ക്ഓവറുകളും പ്രേക്ഷകർക്കിടയിൽ വലിയ ചർച്ചയായിരുന്നു.
1996 ൽ ‘ഇസ് റാത് കി സുബാഹ് നഹിൻ’ എന്ന സിനിമയിലെ ചെറിയ വേഷത്തിലൂടെയാണ് മാധവൻ സിനിമയിലേക്ക് വരുന്നത്. ശാലിനി നായികയായെത്തിയ മണിരത്നത്തിന്റെ ‘അലൈപ്പായുതെ’ എന്ന ചിത്രത്തിലെ അഭിനയത്തിലൂടെയാണ് മാധവൻ സിനിമാപ്രേക്ഷകർക്കിടയിൽ ശ്രദ്ധേയനാകുന്നത്. പിന്നീട് 2002 ൽ ‘കണ്ണത്തിൽ മുത്തമിട്ടാൽ’ എന്ന ചിത്രത്തിൽ അഭിനയിച്ചു. 2003 ൽ ‘റൺ’, ‘ആയുധ എഴുത്ത്’ എന്നീ ചിത്രങ്ങളിൽ മാധവൻ അഭിനയിച്ചു. ‘ആയുധ എഴുത്തി’ലെ അഭിനയത്തിന് ദേശീയപുരസ്കാരത്തിനുള്ള നിർദ്ദേശം ലഭിച്ചിരുന്നു.
ഭാരതസർക്കാറിന്റെ വാർത്താവിനിമയ മന്ത്രാലയത്തിന്റെ കീഴിൽ പ്രവർത്തിക്കുന്ന ഒരു സ്വയംഭരണ സ്ഥാപനമാണ് ഫിലിം ആൻഡ് ടെലിവിഷൻ ഇൻസ്റ്റിറ്റ്യൂട്ട് ഓഫ് ഇന്ത്യ. മഹാരാഷ്ട്രയിലെ പൂനെ ആസ്ഥാനമാക്കി പ്രവർത്തിക്കുന്ന ഈ സ്ഥാപനം പൂനെ ഫിലിം ഇൻസ്റ്റിറ്റ്യൂട്ട് എന്നപേരിലാണ് കൂടുതൽ അറിയപ്പെടുന്നത്.