ഇപ്പോൾ പല പഴയ സിനിമകളും റീ റിലീസ് ചെയ്യുന്നുണ്ട്. ഇറങ്ങിയ സമയത്ത് വേണ്ടത്ര വിജയം ലഭിക്കാതെ പോയ ചിത്രങ്ങൾ പിന്നീട് ഇപ്പോൾ റീ റിലീസ് ചെയ്ത് മികച്ച അഭിപ്രായങ്ങൾ നേടാറുണ്ട്. അങ്ങനെയൊരു ചിത്രമാണ് 2000-ൽ പുറത്തിറങ്ങിയ സിബി മലയിൽ സംവിധാനം ചെയ്ത മോഹൻലാലിന്റെ ‘ദേവദൂതൻ’. ആ സിനിമ എന്തുകൊണ്ട് അന്ന് പരാജയപ്പെട്ടു എന്ന ചോദ്യം ഇപ്പോഴും ഒരു ചോദ്യചിഹ്നം മാത്രമായി നിൽക്കുകയാണ്. ഇപ്പോൾ ചിത്രം വമ്പൻ തിരിച്ചുവരവിനൊരുങ്ങുകയാണെന്ന വാർത്തകൾ വന്നിരുന്നു. അതും ഫോർ കെ മികവിൽ. ചിത്രം ഉടൻ എത്തുമെന്ന് അറിയിച്ചുകൊണ്ടുള്ള ദേവദൂതന്റെ ഒരു പോസ്റ്റർ പങ്കുവെച്ചിരിക്കുകയാണ് നിർമ്മാതാക്കളായ കോക്കേഴ്സ് മീഡിയാ എന്റർടെയിൻമെന്റ്സ്.
View this post on Instagram
പറന്ന് ഉയരുന്ന വെള്ള പ്രാവിനെ നോക്കി നിൽക്കുന്ന നായകന്റെ പിന്നിൽനിന്നുള്ള ചിത്രമാണ് പോസ്റ്ററിൽ ഉള്ളത്. ചിത്രത്തിന്റെ ക്ലെെമാക്സിലെ ദൃശ്യങ്ങളിൽ ഒന്നിനോട് സാമ്യമുള്ള ഒരു ചിത്രമാണിത്. പ്രധാന അണിയറപ്രവർത്തകരുടെ പേരുവിവരങ്ങൾ പോസ്റ്ററിലുണ്ടെങ്കിലും എന്നാണ് റിലീസ് എന്ന് ഇതുവരെ വ്യക്തമായിട്ടില്ല. രഘുനാഥ് പലേരി തിരക്കഥയെഴുതിയ ചിത്രം ഉടൻ റീ റിലീസ് ചെയ്യുമെന്നാണ് ഇപ്പോൾ പുറത്തുവരുന്ന വിവരം. ചിത്രത്തിന്റെ ഡിജിറ്റൽ കളർ കറക്ഷൻ ജോലി പൂർത്തിയായതായി നിർമാതാക്കൾ നേരത്തേ തന്നെ അറിയിച്ചിരുന്നു. ആരാധകരെ പോലെ ചിത്രത്തിന്റെ റീമാസ്റ്റേർഡ് വേർഷൻ കാണാൻ താനും കാത്തിരിക്കുകയാണെന്നായിരുന്നു സംവിധായകൻ സിബി മലയിൽ പറഞ്ഞിരുന്നു.
ഹൊററും മിസ്റ്ററിയും പ്രണയവും സംഗീതവുമെല്ലാം ഒന്നിച്ച് ഇഴചേർത്ത ത്രില്ലർ ചിത്രമായിരുന്നു ദേവദൂതൻ. രണ്ട് വ്യത്യസ്ത ഗെറ്റപ്പുകളിലാണ് മോഹൻലാൽ ചിത്രത്തിൽ പ്രത്യക്ഷപ്പെട്ടത്. മോഹൻലാൽ അവതരിപ്പിച്ച വിശാൽ കൃഷ്ണമൂർത്തി, ജയപ്രദയുടെ അലീന അഥവാ ആഞ്ജെലീന, വിനീത് കുമാറിന്റെ മഹേശ്വർ എന്നീ കഥാപാത്രങ്ങൾ ഇന്നും പ്രേക്ഷക മനസിൽ മായാതെ നിൽക്കുന്നവയാണ്. ജഗതി ശ്രീകുമാർ, ജനാർദനൻ, മുരളി, ശരത്, ജഗദീഷ്, വിജയലക്ഷ്മി, ലെന, രാധിക, നിർമല തുടങ്ങിയവരായിരുന്നു മറ്റുവേഷങ്ങളിൽ ചിത്രത്തിൽ അഭിനയിച്ചത്. വിദ്യാസാഗർ ഈണമിട്ട ഗാനങ്ങൾക്ക് ഇന്നും ആരാധകർ ഏറെയാണ്. ഇതിൽത്തന്നെ എന്തരോ മഹാനുഭാവുലു എന്ന ഗാനത്തിന് ആരാധകമനസുകളിൽ ഇന്നും ഒരു പ്രത്യേക ഇടം തന്നെയുണ്ട്. എന്തരോ മഹാനുഭാവുലു ഒഴികെയുള്ള മറ്റ് ഗാനങ്ങൾ കൈതപ്രം ദാമോദരൻ നമ്പൂതിരിയായിരുന്നു രചിച്ചത്. ഈ ചിത്രത്തിലൂടെ വിദ്യാസാഗറിനെ ആ വർഷത്തെ മികച്ച സംഗീത സംവിധായകനുള്ള സംസ്ഥാന പുരസ്കാരവും തേടിയെത്തി.