നടി കല്യാണി പ്രിയദർശൻ കേന്ദ്ര കഥാപാത്രമായെത്തുന്ന ഏറ്റവും പുതിയ സിനിമയാണ് ‘ശേഷം മൈക്കിൽ ഫാത്തിമ’. ഈ സിനിമയുടെ വേൾഡ് വൈഡ് വിതരണാവകാശം സ്വന്തമാക്കിയിരിക്കുകയാണ് ഗോകുലം ഗോപാലന്റെ ശ്രീ ഗോകുലം മൂവീസ്. ആഗോളതലത്തിലും, ഇന്ത്യൻ സിനിമാ ലോകത്തിലും റെക്കോർഡ് കളക്ഷൻ നേടി മുന്നേറുന്ന ഷാരൂഖ് ഖാന്റെ സിനിമയായ ‘ജവാൻ’ കേരളത്തിലും തമിഴ്‌നാട്ടിലും വിതരണം ചെയ്തത് ഗോകുലം മൂവീസ് ആണ്. അതിനു ശേഷം ഗോകുലം മൂവീസ് ആഗോള തലത്തിൽ റിലീസ് ചെയ്യുന്ന മലയാള ചിത്രമായിരിക്കും ‘ശേഷം മൈക്കിൽ ഫാത്തിമ’.
മനു സി കുമാർ ആണ് ചിത്രത്തിന്റെ സംവിധാനം നിർവഹിക്കുന്നത്. കൂടാതെ ഈ ചിത്രത്തിൽ അനിരുദ്ധ് രവിചന്ദർ ഒരു ഗാനവും ആലപിച്ചിട്ടുണ്ട്. ഈ ഗാനവും, ചിത്രത്തിന്റെ ടീസറുമെല്ലാം പ്രേക്ഷകർക്കിടയിൽ വലിയ തരംഗമായിരുന്നു. മലയാള സിനിമയെ ആഗോളതലത്തിൽ ഏറ്റവും നല്ല രീതിയിൽ അവതരിപ്പിക്കാനുള്ള ഗോകുലം മൂവീസിന്റെ തുടക്കമാണ് ‘ശേഷം മൈക്കിൽ ഫാത്തിമ’ എന്ന ചിത്രമെന്നും, കൂടാതെ വരും നാളുകളിലിൽ അന്യഭാഷാ ചിത്രങ്ങളും മികച്ച മലയാള ചിത്രങ്ങളും ലോകവ്യാപകമായി തിയേറ്ററുകളിലേക്കെത്തിക്കാനുള്ള തയ്യാറെടുപ്പിലാണ് ഗോകുലം മൂവീസ് എന്നും എക്സിക്യൂട്ടീവ് പ്രൊഡ്യൂസർ ആയ കൃഷ്ണമൂർത്തി പറഞ്ഞു. വരും നാളുകളിൽ ഇന്ത്യയിലെ മറ്റു പ്രധാന കേന്ദ്രങ്ങളിലും, വിദേശരാജ്യങ്ങളിലുമടക്കം ഗോകുലം മൂവീസിന്റെ ശൃംഖല വ്യാപിപ്പിക്കുമെന്നും, ഗോകുലം മൂവിസിന് പ്രേക്ഷകർ നൽകുന്ന മികച്ച പിന്തുണയാണ് ഈ വളർച്ചക്ക് പിന്നിലെന്നും അദ്ദേഹം പറഞ്ഞു.
ഫുട്ബാൾ കമന്റേറ്ററായി കല്യാണി പ്രിയദർശൻ വേഷമിടുന്ന കുടുംബ ചിത്രമായ ‘ശേഷം മൈക്കിൽ ഫാത്തിമ’ ഒക്ടോബർ ആദ്യ ആഴ്ച്ചയിൽ പ്രദർശനത്തിനെത്തും. ഗോകുലം മൂവീസിന്റെ ഡിസ്ട്രിബൂഷൻ പാർട്ട്നേഴ്‌സ് ആയ ഡ്രീം ബിഗ് ഫിലിംസാണ് കേരളത്തിൽ ചിത്രത്തിന്റെ വിതരണം നിർവഹിക്കുന്നത്.
കല്യാണി പ്രിയദർശനോടൊപ്പം സുധീഷ്, ഫെമിന, സാബുമോൻ, ഷഹീൻ സിദ്ധിഖ്, ഷാജു ശ്രീധർ, മാല പാർവതി, അനീഷ് ജി മേനോൻ, സരസ ബാലുശ്ശേരി,പ്രിയാ ശ്രീജിത്ത് കൂടാതെ ബാലതാരങ്ങളായ തെന്നൽ, വാസുദേവ് തുടങ്ങിയവരാണ് ചിത്രത്തിലെ മറ്റു കഥാപാത്രങ്ങളായി വേഷമിടുന്നത്. ദി റൂട്ട് , പാഷൻ സ്റ്റുഡിയോസ് എന്നിവയുടെ ബാനറിൽ ജഗദീഷ് പളനിസ്വാമിയും സുധൻ സുന്ദരവും ചേർന്നാണ് ചിത്രം നിർമിക്കുന്നത്. ചിത്രത്തിന്റെ എക്സിക്കുട്ടീവ് പ്രൊഡ്യൂസറായെത്തുന്നത് രഞ്ജിത് നായരാണ്. ഛായാഗ്രഹണം നിർവഹിക്കുന്നത് സന്താന കൃഷ്ണൻ രവിചന്ദ്രനും, സംഗീത സംവിധാനം നിർവഹിക്കുന്നത് ഹിഷാം അബ്ദുൽ വഹാബുമാണ്. എഡിറ്ററായി കിരൺ ദാസ്, ആർട്ട് നിമേഷ് താനൂർ,കോസ്റ്റ്യൂം ചെയ്യുന്നത് ധന്യാ ബാലകൃഷ്ണൻ , മേക്ക് അപ്പ് ചെയ്യുന്നത് റോണെക്സ് സേവിയർ എന്നിവരാണ്. ചീഫ് അസ്സോസിയേറ്റായി സുകു ദാമോദർ, പബ്ലിസിറ്റി യെല്ലോ ടൂത്ത്സ്, പ്രൊഡക്ഷൻ കൺട്രോളറായി റിച്ചാർഡ്, ക്രിയേറ്റിവ് പ്രൊഡ്യൂസറായി ഐശ്വര്യ സുരേഷ് എത്തുന്നു. പി ആർ ഒ : പ്രതീഷ് ശേഖർ.