തനിക്ക് രാഷ്ട്രീയമുണ്ടായിരുന്നു എന്നാലിപ്പോൾ തീർത്തുമില്ലെന്ന് പറയുകയാണ് നടൻ ജഗദീഷ്. ഇപ്പോൾ പിന്തുടരുന്നത് നടൻ മമ്മൂക്കയുടെ രാഷ്ട്രീയമാണെന്നും താരം പറഞ്ഞു. തീപ്പൊരി ബെന്നി എന്ന പുതിയ ചിത്രത്തിന്റെ പ്രമോഷനുമായി ബന്ധപ്പെട്ട് മൂവി വേൾഡ് മീഡിയയ്ക്ക് നൽകിയ അഭിമുഖത്തിലാണ് ജഗദീഷ് തന്റെ രാഷ്ട്രീയ നിലപാട് തുറന്നുപറഞ്ഞത്.
ജഗദീഷിന്റെ വാക്കുകൾ…
”എനിക്കിപ്പോൾ രാഷ്ട്രീയമില്ല. മുൻപ് ഉണ്ടായിരുന്നു എന്നാൽ ഇപ്പോൾ തീർത്തും ഇല്ല. രാഷ്ട്രീയം ഉപേക്ഷിച്ചതിന്റെ കാരണം ഞാൻ ഇതിന് മുൻപ് സൂചിപ്പിച്ചിട്ടുള്ളതാണ്. അതിപ്പോൾ വ്യക്തമാക്കി പറയാം. ഞാൻ രാഷ്ട്രീയത്തിൽ ഇറങ്ങുന്നതിനോടും തെരഞ്ഞെടുപ്പിൽ മത്സരിക്കുന്നതിനോടും രമയ്‌ക്കും കുട്ടികൾക്കും യോജിപ്പില്ലായിരുന്നു. അവരോട് അഭിപ്രായം ചോദിച്ചപ്പോൾ, അത് വേണോ എന്ന അർത്ഥത്തിലാണെനിക്ക് മറുപടി നൽകിയത്, മനസുകൊണ്ടവർക്ക് അതിഷ്ടമല്ലായിരുന്നു. അതിനെ ഒരു പരിധി വരെ കണക്കിലെടുക്കാതെയാണ് ഞാൻ തെരഞ്ഞെടുപ്പിൽ നിന്നത്. അവരുടെ ഉപദേശം സ്വീകരിക്കാത്തതിന്റെ തിക്തഫലം ഞാൻ അനുഭവിച്ചു. അത് കേൾക്കുമ്പോൾ എല്ലാവരും ചിരിക്കാറാണ് പതിവ്. രാഷ്ട്രീയത്തിലെ പരാജയത്തിനെ അങ്ങനെയാണ് ആളുകൾ നോക്കിക്കാണുന്നത്. ഏതു തെരഞ്ഞെടുപ്പിലും പരാജയപ്പെടുന്നവനോട് പുച്ഛമാണ്. പക്ഷെ പരാജിതനായതുകൊണ്ടല്ല ഞാൻ രാഷ്ട്രീയം ഉപേക്ഷിച്ചത്. എന്റെ ഭാര്യയോടും മക്കളോടും യോജിക്കാനുള്ള അവസരം പിന്നീടാണ് എനിക്കു കിട്ടിയത്.
രാഷ്ട്രീയത്തിൽ ഞാനിപ്പോൾ പിന്തുടരാൻ ആഗ്രഹിക്കുന്നത് മമ്മൂക്കയെ ആണ്. മമ്മൂക്ക ഏതെങ്കിലും ഒരു പാർട്ടിയുടെ ആളല്ല. ഒരു തെരഞ്ഞടുപ്പ് വരുമ്പോൾ മൂന്നു സ്ഥാനാർഥികൾ ഉണ്ടാവുമല്ലോ. ആ മൂന്നു സ്ഥാനാർഥികളെയും ഒരേ ബഹുമാനത്തിലാണ് മമ്മൂക്ക സ്വീകരിക്കുക. ഉമ്മൻ ചാണ്ടിയുടെയും , വി ഡി സതീശന്റെയും രമേശ് ചെന്നിത്തലയുടെ യോഗത്തിലും മമ്മൂക്ക പങ്കെടുത്തിട്ടുണ്ട്. പിണറായി സഖാവിന്റെയും എം വി ഗോവിന്ദന്റെ യോഗത്തിലും പങ്കെടുക്കും, കൂടാതെ അദ്വാനിയുടെ പുസ്തക പ്രകാശനം നിർവഹിച്ചത് മമ്മൂക്കയാണ്. എല്ലാ പാർട്ടികൾക്കും അദ്ദേഹം സ്വീകാര്യനാണ്. അദ്ദേഹം സമദൂരമല്ല സമഅടുപ്പമാണ് എല്ലാവരുമായും സൂക്ഷിക്കുന്നത് . അതാണ് ഞാൻ പിന്തുടരാൻ ആഗ്രഹിക്കുന്നത്. അതുകൊണ്ടുതന്നെ തോറ്റതിൽ ഇപ്പോളെനിക്ക് സങ്കടമില്ല.. ഇപ്പോൾ എല്ലാവർക്കും എന്നോട് ഒരുപോലെ സ്നേഹവും ഉണ്ട്. ഞാനൊരിക്കലും ഒരു പാർട്ടിയിൽ നിന്ന് മറ്റൊന്നിലേക്കു കൂറു മാറിയിട്ടില്ല, രാഷ്ട്രീയം മൊത്തമായി ഉപേക്ഷിച്ചതാണ്. രാഷ്ട്രീയത്തിൽ പ്രവർത്തിക്കാൻ ഞാൻ യോഗ്യനല്ലെന്ന് തിരിച്ചറിഞ്ഞ ഞാൻ സ്വയം മാറിയതാണ് ,” എന്നാണ് ജഗദീഷ് പറഞ്ഞത്.
അർജുൻ അശോകൻ നായകനായി എത്തുന്ന പുതിയ ചിത്രമാണ് “തീപ്പൊരി ബെന്നി’ . ചിത്രത്തിന്റെ ട്രെയിലർ അടുത്തിടെ പുറത്തിറങ്ങിയിരുന്നു. രാഷ്ട്രീയത്തെ വെറുക്കുന്ന ബെന്നിയും ഇടതുപക്ഷ ചിന്താഗതിയുള്ള ചേട്ടായിയും തമ്മിലുള്ള രസകരമായ നിമിഷങ്ങൾ ഉൾക്കൊള്ളുന്നതാണ് ട്രെയിലർ. ഹാസ്യവും നർമ്മവും ഇടകലർത്തികൊണ്ടുള്ള ട്രെയിലറിൽ രാഷ്ട്രീയ സംവിധാനങ്ങളോടുള്ള ഒരു വിഭാഗത്തിന്റെ വെറുപ്പും അഴിമതിയും മറ്റും പ്രകടമാണ്.