ബിഗ് ബോസ് റിയാലിറ്റി ഷോയിലൂടെ താരമായി മാറിയ നടിയാണ് ഓവിയ ഹെലന്. മലയാളിയായ ഓവിയ ബിഗ് ബോസ് തമിഴിന്റെ ആദ്യ സീസണിലൂടെയാണ് ശ്രദ്ധ നേടുന്നത്. ബിഗ് ബോസ് തമിഴിന്റെ ആദ്യ സീസണില് വലിയ കോളിളക്കം സൃഷ്ടിച്ച മത്സരാര്ത്ഥിയായിരുന്നു ഈ നടി. പകുതിക്ക് വച്ച് ഷോയില് നിന്നും സ്വയം പുറത്തുപോയ താരം തമിഴകത്ത് തരംഗമായി മാറുകയായിരുന്നു. വലിയ ജനപ്രീതി തന്നെയാണ് താരത്തിന് ലഭിച്ചത്.
ബിഗ് ബോസിലെ സഹമത്സരാര്ത്ഥിയായിരുന്ന ആരവുമായുള്ള ഓവിയയുടെ പ്രണയവും അതുമായി ബന്ധപ്പെട്ട പ്രശ്നങ്ങളുമാണ് ഓവിയക്ക് വലിയ ശ്രദ്ധനേടി കൊടുത്തത്. ഓവിയക്ക് വേണ്ടി നിരവധി ആര്മി ഗ്രൂപ്പുകളും മറ്റും അക്കാലത്ത് ഉണ്ടായിരുന്നു. എന്നാല് അധിക കാലം ലൈം ലൈറ്റില് നില്ക്കാന് ഓവിയക്ക് കഴിഞ്ഞില്ല. എങ്കിലും സിനിമകളില് നിന്നെല്ലാം അവസരങ്ങള് താരത്തെ തേടി എത്തിയിരുന്നു. ഇപ്പോള് ചൂയിഗം എന്ന സീരീസിലൂടെ വെബ് സീരീസ് അരങ്ങേറ്റത്തിനും ഒരുങ്ങുകയാണ് ഓവിയ. അതിന്റെ പ്രമോഷന് തിരക്കുകളിലാണ് നടിയിപ്പോള്.
പ്രമോഷന്റെ ഭാഗമായി നിരവധി അഭിമുഖങ്ങള് താരം നല്കിയിരുന്നു. മിക്ക അഭിമുഖങ്ങളിലും വിവാഹം സംബന്ധിച്ച ചോദ്യങ്ങളാണ് ഓവിയക്ക് നേരിടേണ്ടി വന്നിരുന്നത്. അതിനിടെ ഒരു അഭിമുഖത്തില് തന്റെ പ്രണയ ബന്ധങ്ങളെ കുറിച്ച് ഓവിയ സംസാരിച്ചിരുന്നു. ആ വാക്കുകള് ഇപ്പോള് ശ്രദ്ധനേടുകയാണ്. തനിക്ക് ഒരുപാട് പ്രണയങ്ങള് ഉണ്ടായിരുന്നുവെന്നും എന്നാല് അതൊന്നും വര്ക്ക്ഔട്ട് ആയില്ലെന്നും ഓവിയ പറഞ്ഞു. ആ ബന്ധങ്ങളില് എല്ലാം താന് ആത്മാര്ത്ഥത പുലര്ത്തിയിരുന്നെങ്കിലും പണം മാത്രം കണ്ട് വന്ന പലരും തന്നെ ഉപയോഗിക്കുകയും വഞ്ചിക്കുകയും ചെയ്തെന്ന് ഓവിയ പറയുന്നു.
അതേസമയം,മറ്റൊരു അഭിമുഖത്തില് വിവാഹത്തെ കുറിച്ച് ഓവിയ പറഞ്ഞതും വൈറലായിരുന്നു. താനിപ്പോള് വിവാഹിതയാകാന് ആഗ്രഹിക്കുന്നില്ല. ഭാവിയില് വിവാഹം ചെയ്യുമെന്നും ഉറപ്പില്ല. വിവാഹം എല്ലാവര്ക്കും പറ്റിയ കാര്യമാണെന്ന് തോന്നുന്നില്ലെന്നും നടി വ്യക്തമാക്കി. വിവാഹം കഴിച്ച് ഹാപ്പിയായി ജീവിക്കുന്നവര് ഒരുപാടുണ്ട്. പക്ഷെ സന്തോഷമില്ലാതെ പേരിന് വേണ്ടി കല്യാണം കഴിച്ച് ജീവിതം തുലയ്ക്കുന്നവരും ഉണ്ട്. അത്തരമാെരു റിസ്ക് എടുക്കാനുള്ള ധൈര്യം തനിക്കിപ്പോള് ഇല്ലെന്നാണ് നടി പറഞ്ഞത്.
തൃശൂര് സ്വദേശിയാണ് ഓവിയ. സൂര്യ മ്യൂസിക്കില് അവതാരകയായിട്ടായിരുന്നു നടിയുടെ തുടക്കം. തുടര്ന്ന് കങ്കാരൂ, പുതിയ മുഖം തുടങ്ങിയ സിനിമകളിലൂടെ അഭിനയത്തിലേക്കും എത്തി. തുടര്ന്ന് തമിഴ് അടക്കമുള്ള മറ്റു തെന്നിന്ത്യന് ഭാഷകളില് നിന്നും അവസരങ്ങള് തേടി എത്തുകയായിരുന്നു. തമിഴ് സിനിമയില് ചെറിയ വേഷങ്ങളിലൂടെ ശ്രദ്ധനേടി വരുന്നതിനിടയിലായിരുന്നു താരത്തിന് ബിഗ് ബോസിലേക്ക് അവസരം ലഭിക്കുന്നത്. അത് ഓവിയയുടെ കരിയറില് തന്നെ വഴിത്തിരിവായി മാറി. ഇപ്പോള് സിനിമയിലും വെബ്സീരിസിലും സജീവമാകാനുള്ള തയ്യാറെടുപ്പിലാണ് താരം.