ക്രിസ്മസ് റിലീസിനൊരുങ്ങി ജയറാമിന്റെ ‘ഓസ്‍ലർ’

0
191

ലയാളിപ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന ജയറാമിന്റെ വരാനിരിക്കുന്ന ചിത്രമാണ് അബ്രഹാം ഓസ്‍ലർ. ഒരു ഇടവേളയ്ക്ക് ശേഷം ജയറാം മലയാളത്തിലേക്ക് തിരികെയെത്തുമ്പോൾ മാസ് ലുക്കിലാണ് താരം ചിത്രത്തിൽ എത്തുന്നത്. അഞ്ചാം പാതിരയ്ക്ക് ശേഷം മിഥുൻ മാനുവൽ തോമസ് സംവിധാനം ചെയ്യുന്ന ചിത്രത്തിന്റ രചന നിർ‍വ്വഹിച്ചിരിക്കുന്നത് ഡോക്ടര്‍ രണ്‍ധീര്‍ കൃഷ്ണയാണ്. ഇപ്പോഴിതാ ചിത്രത്തിന്റെ റിലീസ് തീയ്യതി പ്രഖ്യാപിച്ചിരിക്കുകയാണ്. ഈ ഡിസംബറില്‍ ക്രിസ്മസ് റിലീസ് ആയി ചിത്രം തിയറ്ററുകളിലെത്തും. ജയറാമിന്‍റെ നായക കഥാപാത്രത്തെ അവതരിപ്പിച്ചുകൊണ്ടുള്ള പോസ്റ്റർ പങ്കുവച്ചാണ് റിലീസ് വാർത്ത അണിയറപ്രവർത്തകർ പുറത്തുവിട്ടിരിക്കുന്നത്.

നേരത്തെ, ചിത്രത്തിൻറെ സെക്കന്റ് ലുക്ക് പോസ്റ്റർ പുറത്തിറങ്ങിയിരുന്നു. ആൾക്കൂട്ടത്തിനും പോലീസുകാർക്കും ഇടയിലൂടെ നടന്നു വരുന്ന ലുക്കിലാണ് ജയറാമിനെ സെക്കന്റ് പോസ്റ്ററിൽ കാണാൻ സാധിച്ചത്. സോള്‍ട്ട് ആന്‍ഡ് പെപ്പര്‍ ലുക്കിൽ ജയറാം പ്രത്യക്ഷപ്പെട്ടിരിക്കുന്ന ഫസ്റ്റ് ലുക്ക് പോസ്റ്റർ സോഷ്യൽ മീഡിയയിൽ നിമിഷ നേരം കൊണ്ടാണ് വൈറലായത്.

പൂർണ്ണമായും മെഡിക്കൽ പശ്ചാത്തലത്തിൽ ഒരുങ്ങുന്ന ഒരു ക്രൈം ത്രില്ലറാണ് അബ്രഹാം ഓസ്‍ലര്‍. ഒരു കൊലക്കേസ് അന്വേഷണമാണ് പോലീസ് കമ്മീഷണർ അബ്രഹാം ഓസ്‌ലറിലൂടെ നടത്തുന്നത്. ഏറെ ദുരൂഹതകളും സസ്പെൻസുമൊക്കെ നിറഞ്ഞ ഒരു ഇൻവെസ്റ്റിഗേറ്റീവ് ത്രില്ലർ എന്ന് ചിത്രത്തിനെ വിശേഷിപ്പിക്കാൻ സാധിക്കും.ഒരു ക്രൈം ത്രില്ലറിന്‍റെ എല്ലാ ആവേശവും നിലനിർത്തിയാണ് ചിത്രത്തിന്‍റെ അവതരണം. അർജുൻ അശോകൻ, ജഗദീഷ്, ദിലീഷ് പോത്തൻ, അനശ്വര രാജൻ, സെന്തിൽ കൃഷ്ണ, അർജുൻ നന്ദകുമാർ, ആര്യ സലിം, അസീം ജമാൽ എന്നിവരാണ് മറ്റ് പ്രധാന താരങ്ങള്‍. തൃശൂർ, പാലക്കാട്, കോയമ്പത്തൂർ, വയനാട് എന്നീ ജില്ലകളിലായി ചിത്രീകരിക്കുന്ന ചിത്രം ഇർഷാദ് എം ഹസനും മിഥുൻ മാനുവൽ തോമസ്സും ചേർന്നാണ് നിർമ്മിക്കുന്നത്. തേനി ഈശ്വര്‍ ഛായാഗ്രഹണം നിർവഹിക്കുന്ന ചിത്രത്തിന്ന്റെ എഡിറ്റിംഗ് ചെയ്യുന്നത് സൈജു ശ്രീധരനാണ്. സംഗീതമൊരുക്കുന്നത് മിഥുന്‍ മുകുന്ദനും കലാസംവിധാനം ഗോകുല്‍ ദാസുമാണ്.

ആടിലൂടെയും അഞ്ചാം പാതിരയിലൂടെയും മലയാളി പ്രേക്ഷകരുടെ മനസ് തൊട്ടറിഞ്ഞ സംവിധായകനും ഒരിടവേളക്ക് ശേഷം മലയാളത്തിലേക്ക് തിരികെയെത്തുന്ന ജയറാമും ഒരുമിക്കുമ്പോൾ അതി ഗംഭീര സ്വീകരണമാണ് ഈ ചിത്രത്തിന് പ്രഖ്യാപന സമയം മുതൽ പ്രേക്ഷകർക്ക് നൽകുന്നത്. 2022ല്‍ പുറത്തിറങ്ങിയ മകള്‍ എന്ന ചിത്രത്തിലാണ് ജയറാം അവസാനമായി മലയാളത്തിൽ അഭിനയിച്ചത്. ഈ കാലയളവിൽ പൊന്നിയിൻ സെൽവൻ ഉൾപ്പെടെയുളള ബിഗ് ബജറ്റ് സിനിമകളിൽ താരം അഭിനയിച്ചിരുന്നു. ജയറാമിന്റെ മാസ് പ്രകടനത്തിനായി കാത്തിരിക്കുകയാണ് പ്രേക്ഷകർ.

 

LEAVE A REPLY

Please enter your comment!
Please enter your name here