ഓണം സ്പെഷ്യലായി തീയേറ്ററിൽ എത്തിയ ചിത്രമാണ് ആര്‍.ഡി.എക്‌സ്. ആന്റണി വര്‍ഗീസ്, ഷെയ്ന്‍ നിഗം, നീരജ് മാധവ് എന്നിവരെ ടൈറ്റില്‍ കഥാപാത്രങ്ങളാക്കി നവാഗതനായ നഹാസ് ഹിദായത്ത് ആണ് ചിത്രം സംവിധാനം ചെയ്തിരിക്കുന്നത്. എന്നാൽ ഇപ്പോഴിതാ സിനിമയ്‌ക്കെതിരെ പരോക്ഷ വിമര്‍ശനവുമായി എത്തിയിരിക്കുകയാണ് പി.കെ. റോസി ഫൗണ്ടേഷന്‍. തിരുവനന്തപുരം ജില്ലയിലെ രാജാജി നഗര്‍ ഗുണ്ടകളുടെയും, അനാശാസ്യ പ്രവര്‍ത്തനങ്ങളുടെയും താവളമായി സിനിമകളിൽ ചിത്രീകരിക്കുന്നത് നിർത്തണമെന്നാണ് പി.കെ. റോസി ഫൗണ്ടേഷന്‍ പ്രസ്താവനയില്‍ പറയുന്നത്.
ആര്‍.ഡി.എക്‌സ് സിനിമയിൽ മഹാരാജാസ് കോളനിയായി കാണിച്ച സ്ഥലങ്ങൾ രാജാജി നഗറില്‍ ചിത്രീകരിച്ചതുമായി ബന്ധപ്പെട്ടാണെന്നാണ് പി.കെ. റോസി ഫൗണ്ടേഷൻ പറയുന്നത്. പുതുതലമുറയിലെ കുട്ടികള്‍ ആത്മാഭിമാനത്തോടെ വളര്‍ന്നുവരുന്ന ഒരു സ്ഥലത്തെ എന്തും കാണിക്കാം എന്നുള്ള ധാരണ തിരുത്തണമെന്നുമാണ് പ്രസ്താവനയിൽ പറയുന്നത്. ഇനിമുതല്‍ സിനിമകളിൽ രാജാജി നഗറില്‍ ചിത്രീകരിക്കപ്പെടുന്ന ഭാഗങ്ങള്‍ ഉത്തരവാദിത്തപ്പെട്ടവര്‍ വ്യക്തമായി വായിച്ചുനോക്കി അനുമതി നല്‍കാന്‍ ശ്രദ്ധിക്കണമെന്നുമാണ് പ്രസ്താവനയിലൂടെ വ്യക്തമാക്കുന്നത്. പി.കെ. റോസി ഫൗണ്ടേഷന്റെ പ്രസ്താവനയിൽ പറയുന്നത് ഇങ്ങനെയാണ്,
”ചലച്ചിത്ര പ്രവര്‍ത്തകരുടെ ശ്രദ്ധക്ക്. തിരുവനന്തപുരം രാജാജി നഗര്‍ ഗുണ്ടകളുടെയും, അനാശാസ്യ പ്രവര്‍ത്തനങ്ങളുടെയും താവളമായി ചിത്രീകരിക്കുന്നത് നിര്‍ത്തുക! പ്രതിഭകളെ (മികച്ച ബാലതാരത്തിനുള്ള സംസ്ഥാന അവാര്‍ഡ്) ലോകത്തിനുമുന്നില്‍ നല്‍കിയ/ നല്‍കാന്‍ പ്രാപ്തിയുള്ള കേരളത്തിന്റെ അഭിമാനമായി ഉയര്‍ത്തിക്കാട്ടാന്‍ സാധ്യതയുള്ള നഗരത്തിന്റെ ഹൃദയഭാഗമാണ് രാജാജി നഗര്‍. അവിടുത്തെ പുതുതലമുറയിലെ കുട്ടികള്‍ ആത്മാഭിമാനത്തോടെയാണ് വളര്‍ന്നുവരുന്നവരുന്നത്. അവിടെ കയറി എന്തും കാണിക്കാം എന്നുള്ള ധാരണ തിരുത്തുക.
തിയേറ്ററില്‍ നിറഞ്ഞ സദസ്സില്‍ ഓടിക്കൊണ്ടിരിക്കുന്ന ഒരു മലയാള ചിത്രത്തിലെ ചില രംഗങ്ങള്‍ ഒരു കൂട്ടം കയ്യടിച്ചു സ്വീകരിക്കുമ്പോഴും, മറുവശത്ത് പുതുതലമുറ ആശങ്കയിലാണ്. ഈ ചത്രീകരണത്തില്‍ പി.കെ. റോസി ഫൗണ്ടേഷന്‍ വിഷയത്തില്‍ ശക്തമായ പ്രതിഷേധം അറിയിക്കുന്നു. പ്രദേശവാസികള്‍ വരുംതലമുറയ്ക്കായി അതീവ ജാഗ്രത പുലര്‍ത്തേണ്ടതുണ്ട്. അവിടെ ചിത്രീകരിക്കുന്ന ഭാഗത്തിന്റെ മാത്രം സ്‌ക്രിപ്റ്റ് പൂര്‍ണമായും രാജാജി നഗറിലെ ഉത്തരവാദിത്തപ്പെട്ടവര്‍ വായിച്ചുനോക്കി ചിത്രീകരിക്കാന്‍ അനുമതി നല്‍കാന്‍ ശ്രദ്ധിക്കുമല്ലോ.” എന്നാണ് പ്രസ്താവനയിൽ പറയുന്നത്.
ആദര്‍ശ് സുകുമാരന്‍, ഷബാസ് റഷീദ് എന്നിവരുടേതാണ് തിരക്കഥ. ചിത്രം കൂടുതലും ആക്ഷന്‍ പാക്ക് ആയാണ് ചിത്രം ഒരുങ്ങിയിരിക്കുന്നത്. കെജിഎഫ്, വിക്രം, ബീസ്റ്റ് തുടങ്ങിയ ചിത്രങ്ങള്‍ക്ക് സംഘട്ടനം ഒരുക്കിയ അന്‍പറിവ് ആണ് ഈ ചിത്രത്തിന്റെ ആക്ഷന്‍ രംഗങ്ങള്‍ കൈകാര്യം ചെയ്തത്. ബാബു ആന്റണി, ലാല്‍, ഐമ റോസ്മി സെബാസ്റ്റ്യന്‍, മഹിമ നമ്പ്യാര്‍, മാല പാര്‍വതി, ബൈജു തുടങ്ങിയവരും ചിത്രത്തില്‍ അഭിനയിക്കുന്നുണ്ട്.