എന്റെ റെക്കോര്‍ഡ് നീ തകര്‍ക്കുമോയെന്ന് മമ്മുട്ടിയങ്കിള്‍ ചോദിച്ചുവെന്ന് ധ്യാന്‍ ശ്രീനിവാസന്‍. നദികളില്‍ സുന്ദരി യമുനയുടെ വാര്‍ത്താ സമ്മേളനത്തിലാണ് ധ്യാന്‍ ഇക്കാര്യം പറഞ്ഞത്. ഒരു വര്‍ഷം 34 സിനിമ ചെയ്ത തന്റെ റെക്കോര്‍ഡ് നീ തകര്‍ക്കുമോയെന്നും, പ്രൊഡ്യൂസര്‍ അസോസിയേഷന് നിലനിന്ന് പോകുന്നതിന് കാരണക്കാരന് ഇവനാണെന്ന് ആന്റോ ജോസഫ് പറഞ്ഞെന്നും ധ്യാന്‍ പറഞ്ഞു.
ധ്യാന്‍ പറഞ്ഞ വാക്കുകള്‍
”ഞാന്‍ ജയിലറിന്റെ ഷൂട്ടിങ്ങിലിരിക്കുമ്പോള്‍ അപ്പുറത്ത് നന്‍പകല്‍ നേരത്തെ മയക്കത്തിന്റെ ചിത്രീകരണം നടക്കുകയാണ്. കുറച്ചുദിവസമായി മമ്മൂട്ടി അങ്കിള്‍ അപ്പുറത്ത് റൂമില്‍ ഉണ്ട് എന്നറിയാം. പക്ഷേ ഞാന്‍ ഷൂട്ടിങ്ങിന്റെ തിരക്കിലാണല്ലോ, എനിക്ക് അദ്ദേഹത്തെ കാണാന്‍ സമയം കിട്ടുന്നില്ല. മമ്മൂട്ടി അങ്കിള്‍ ദിവസവും ഷൂട്ടിങ് കഴിഞ്ഞു വരും, അവന്‍ അപ്പുറത്ത് ഉണ്ടല്ലോ ഇത്രയും ദിവസമായി എന്നെ കാണാന്‍ വന്നില്ലല്ലോ എന്ന് വിചാരിക്കുന്നുണ്ടാകും. അവര്‍ 28 ദിവസത്തെ ഷൂട്ടിങ് കഴിഞ്ഞു പോയി, ഞാന്‍ 42 ദിവസത്തെ ചിത്രീകരണവുമായി വലിയ തിരക്കിലാണ്.
ഒരു ദിവസം രാത്രി എന്നെ നിര്‍മാതാവ് ആന്റോ ചേട്ടന്‍, മമ്മൂട്ടി അങ്കിളിന്റെ അടുത്ത് എന്നെ വിളിച്ചു കൊണ്ടുപോയി. പ്രൊഡ്യൂസര്‍ അസോസിയേഷന് നിലനിന്നു പോകുന്നതിന്റെ കാരണക്കാരന് ആയ വ്യക്തിയെ ദാ കൊണ്ടുവന്നിരിക്കുന്നു എന്നു പറഞ്ഞു. അവര്‍ പറഞ്ഞതിലും കാര്യമുണ്ട്, കാരണം എത്രയോ ആളുകള്‍ക്കാണ് നമ്മള്‍ ജോലി കൊടുക്കുന്നത്. അത്രയും ആളുകള്‍ അവിടെ റജിസ്റ്റര്‍ ചെയ്യുകയല്ലേ. അസോസിയേഷന് അവിടെ നിന്നല്ലേ ഫണ്ട് വരുന്നത്. എന്നോട് മമ്മൂട്ടി അങ്കിള്‍ ചോദിച്ചു, ”ഈ വര്‍ഷം എത്ര സിനിമയായി”. ഞാന്‍ പറഞ്ഞു ഒരു 8 എണ്ണം ആയി. അദ്ദേഹം പറഞ്ഞു, ”84ലോ 86ലോ മറ്റോ എനിക്കൊരു റെക്കോര്‍ഡ് ഉണ്ടായിരുന്നു, 34 പടം അഭിനയിച്ചതിന്റെ, ആ റെക്കോര്‍ഡ് നീ ബ്രേക്ക് ചെയ്യുമോ?”. ഞാന്‍ ശ്രമിക്കുന്നുണ്ട്. ഐ വില്‍ ട്രൈ മൈ ബെസ്റ്റ്” .
അതേസമയം,ധ്യാന്‍ ശ്രീനിവാസന്‍, അജു വര്‍ഗീസ് എന്നിവര്‍ നായകന്മാരാകുന്ന ‘നദികളില്‍ സുന്ദരി യമുന’ ട്രെയിലര്‍ പുറത്തിറങ്ങി. സെപ്റ്റംബര്‍ പതിനഞ്ചിന് ചിത്രം തിയറ്ററുകളില്‍ എത്തും. മലയാളി പ്രേക്ഷകര്‍ ഒന്നടങ്കം സുന്ദരിയായ ആ യമുനയെ കാണുവാനുള്ള ആകാംക്ഷയിലാണ്.
കണ്ടത്തില്‍ കണ്ണനായി ധ്യാന്‍ ശ്രീനിവാസനും വിദ്യാധരനായി അജു വര്‍ഗീസുമാണ് ചിത്രത്തിലെ നായകന്‍മാരായി എത്തുന്നത്. സിനിമാറ്റിക് ഫിലിംസ് എല്‍ എല്‍ പിയുടെ ബാനറില്‍ വിലാസ് കുമാര്‍, സിമി മുരിക്കഞ്ചേരി എന്നിവര്‍ ചേര്‍ന്ന് നിര്‍മിക്കുന്ന ചിത്രം തിരക്കഥയെഴുതി സംവിധാനം ചെയ്യുന്നത് നവാഗതരായ വിജേഷ് പാണത്തൂര്‍, ഉണ്ണി വെള്ളാറ എന്നിവര്‍ ചേര്‍ന്നാണ്. ധ്യാന്‍ ശ്രീനിവാസനാണ് ചിത്രത്തിലെ നായകന്‍. ക്രെസന്റ് റിലീസ് ത്രൂ സിനിമാറ്റിക്ക ഫിലിംസാണ് ചിത്രത്തിന്റെ വിതരണം.
കണ്ണൂരിലെ നാട്ടുമ്പുറങ്ങളാണ് ഈ ചിത്രത്തിന്റെ പശ്ചാത്തലം. ഇവിടുത്തെ സാധാരണക്കാരായ മനുഷ്യര്‍, അവര്‍ക്കിടയിലെ കണ്ണന്‍, വിദ്യാധരന്‍ എന്നീ രണ്ട് യുവാക്കളുടെ കഥയാണ് ചിത്രം പറയുന്നത്. കണ്ണനെ ധ്യാന്‍ ശ്രീനിവാസനും, വിദ്യാധരനെ അജു വര്‍ഗീസും അവതരിപ്പിക്കുന്നു. സുധീഷ്, കലാഭവന്‍ ഷാജോണ്‍, നിര്‍മ്മല്‍ പാലാഴി, നവാസ് വള്ളിക്കുന്ന്, സോഹന്‍ സിനുലാല്‍, രാജേഷ് അഴിക്കോടന്‍, കിരണ്‍ രമേശ്, ഭാനു പയ്യന്നൂര്‍, ശരത് ലാല്‍, ദേവരാജ് കോഴിക്കോട്, അനീഷ്, ആതിര,ആമി, പാര്‍വ്വണ, ഉണ്ണിരാജ, വിസ്മയ ശശികുമാര്‍ എന്നിവരും നിരവധി പുതുമുഖങ്ങളും ഈ ചിത്രത്തില്‍ അണിനിരക്കുന്നു.
മനു മഞ്ജിത്തിന്റെയും ഹരിനാരായണന്റെയും വരികള്‍ക്ക് അരുണ്‍ മുരളീധരന്‍ ഈണം പകര്‍ന്നിരിക്കുന്നു. ശങ്കര്‍ ശര്‍മയാണ് ബി.ജി.എം. ‘സരിഗമ’യാണ് ചിത്രത്തിന്റെ ഗാനങ്ങളുടെ റൈറ്റ്‌സ് സ്വന്തമാക്കിയിരിക്കുന്നത്. ചിത്രത്തിന്റെ തീയറ്റര്‍ റിലീസിനു ശേഷമുള്ള ഒടിടി റൈറ്റ്‌സ് പ്രമുഖ ഒടിടി കമ്പനിയായ ഒഞ ഛഠഠയാണ് സ്വന്തമാക്കിയിരിക്കുന്നത്.
ഫൈസല്‍ അലി ഛായാഗ്രഹണവും രതിന്‍ രാധാകൃഷ്ണന്‍ എഡിറ്റിങും നിര്‍വ്വഹിക്കുന്നു. കലാസംവിധാനം: അജയന്‍ മങ്ങാട്, മേക്കപ്പ്: ജയന്‍ പൂങ്കുളം, കോസ്റ്റ്യും ഡിസൈന്‍: സുജിത് മട്ടന്നൂര്‍, ചീഫ് അസ്സോഷ്യേറ്റ് ഡയറക്ടര്‍: പ്രിജിന്‍ ജെസ്സി, പ്രോജക്ട് ഡിസൈന്‍: അനിമാഷ്, വിജേഷ് വിശ്വം, കളറിസ്റ്റ്: ലിജു പ്രഭാകര്‍, സൗണ്ട് ഡിസൈന്‍: ശ്രീജിത്ത് ശ്രീനിവാസന്‍, സൗണ്ട് മിക്‌സിങ്: വിപിന്‍ നായര്‍, ഫിനാന്‍സ് കണ്‍ട്രോളര്‍: അഞ്ജലി നമ്പ്യാര്‍, പ്രൊഡക്ഷന്‍ മാനേജര്‍: മെഹമൂദ്, പ്രൊഡക്ഷന്‍ എക്സിക്യുട്ടീവ്സ്: പ്രസാദ് നമ്പ്യാങ്കാവ്, അനീഷ് നന്ദിപുലം, പ്രൊഡക്ഷന്‍ കണ്‍ട്രോളര്‍: സജീവ് ചന്തിരൂര്‍, പിആര്‍ഒ: വാഴൂര്‍ ജോസ്, എ എസ് ദിനേഷ്, ആതിര ദില്‍ജിത്ത്, ഫോട്ടോ: സന്തോഷ് പട്ടാമ്പി, ഡിജിറ്റല്‍ മാര്‍ക്കറ്റിങ്: അനൂപ് സുന്ദരന്‍, പ്രമോഷന്‍ സ്റ്റില്‍സ്: രോഹിത് കെ സുരേഷ്.