മലയാള ചലച്ചിത്ര ലോകത്ത് നിരവധി ചിത്രങ്ങൾ ചെയ്ത സംവിധായകൻ വേണുഗോപൻ രാമാട്ട് അന്തരിച്ചു. അറുപത്തി ഏഴ് വയസായിരുന്നു അദ്ദേഹത്തിന്. ചേർത്തല കടക്കരപ്പള്ളി സ്വദേശിയാണ് അദ്ദേഹം. സംസ്കാരം ഇന്ന് രാത്രി 8.30 ന് വീട്ടുവളപ്പിൽ വെച്ചാണ് നടക്കുക.
മലയാളത്തിൻറെ പ്രശസ്ത സംവിധായകൻ പി. പദ്മരാജന് ഒപ്പം ഒട്ടനവധി ചിത്രങ്ങളിൽ സഹ സംവിധായകൻ ആയി പ്രവർത്തിച്ച ആളാണ് വേണു ഗോപൻ. പത്ത് വർഷം ആയിരുന്നു അദ്ദേഹം പദ്മരാജന് ഒപ്പം സിനിമകളിൽ പ്രവർത്തിച്ചിരുന്നത്. മുന്തിരി തോപ്പുകൾ, നൊമ്പരത്തി പൂവ്, ഇന്നലെ, സീസൺ, ഞാൻ ഗന്ധർവ്വൻ എന്നിങ്ങനെ നിരവധി സിനിമകളിൽ സഹസംവിധായകനായി പ്രവർത്തിച്ചിട്ടുണ്ട്. 1995ൽ പുറത്തിറങ്ങിയ കുസൃതി കുറുപ്പാണ് വേണു ഗോപൻ ആദ്യം സംവിധാനം ചെയ്ത ചിത്രം. ജയറാമും നടി മീനയുമായിരുന്നു ചിത്രത്തിലെ നായികാ നായക വേഷത്തിൽ എത്തിയത്.
ഷാർജ ടു ഷാർജ, ചൂണ്ട, സ്വർണം, റിപ്പോർട്ടർ, സർവോപരി പാലക്കാരൻ, തുടങ്ങി ഒട്ടനവധി ഹിറ്റ് സിനിമകളും സംവിധായകൻ വേണുഗോപൻ സംവിധാനം ചെയ്തിട്ടുണ്ട്. ലതയാണ് വേണുഗോപൻറെ ഭാര്യ. ലക്ഷ്മി, വിഷ്ണു ഗോപൻ എന്നവരാണ് മക്കൾ. രവീഷ് ആണ് മരുമകൻ.