പ്രേക്ഷകർ അത്യധികം ആകാംഷയോടെ കാത്തിരിക്കുന്ന മമ്മൂട്ടി ചിത്രമാണ് ‘കാതൽ:ദ കോർ’. ചിത്രം ഇപ്പോൾ പ്രദർശനത്തിനെത്തുന്നു എന്ന വാർത്തകളാണ് പുറത്തുവരുന്നത്. ഇരുപത്തി എട്ടാമത് ഐഎഫ്എഫ്കെയിലാണ് ചിത്രം പ്രദർശിപ്പിക്കുക. മലയാളം സിനിമ ടുഡേ എന്ന വിഭാഗത്തിൽ പ്രദർശിപ്പിക്കുന്ന കാതലിന്റെ സംവിധാനം നിർവഹിച്ചത് ജിയോ ബേബി ആണ്. ചലച്ചിത്ര മേള മത്സര വിഭാഗത്തിലേക്ക് രണ്ട് മലയാള സിനിമകാളാണ് തെരഞ്ഞെടുത്തിട്ടുളളത്. ഡോൺ പാലത്തറയുടെ ‘ഫാമിലി’, ഫാസിൽ റസാഖിന്റെ ‘തടവ്’ എന്നീ ചിത്രങ്ങൾ ആണ് അവ രണ്ടും. ഐഎഫ്എഫ്കെയുടെ ഒഫീഷ്യൽ ഫേസ്ബുക്ക് അക്കൗണ്ടിലൂടെ ആണ് ഈ വിവരങ്ങൾ പുറത്തുവിട്ടത്.
ഫൈവ് ഫസ്റ്റ് ഡേറ്റ്സ്, എന്നെന്നും, നീലമുടി, ആപ്പിൾ ചെടികൾ, ബി 32 മുതൽ 44 വരെ, ഷെഹർ സാദേ, ആട്ടം, ദായം, ഓ ബേബി, ആനന്ദ് മോണാലിസയും കത്ത്, വലസൈ പറവകൾ എന്നിവയാണ് കാതലിനൊപ്പം സിനിമാ ടുഡേ വിഭാഗത്തിൽ പ്രദർശിപ്പിക്കുന്ന മറ്റ് ചിത്രങ്ങൾ. ഡിസംബര്‍ 8 മുതല്‍ പതിനഞ്ച് വരെയാണ് 28-മത് കേരള ഫിലിം ഫെസ്റ്റിവല്‍ നടക്കുക. നേരത്തെ ലിജോ ജോസ് പെല്ലിശ്ശേരി സംവിധാനം ചെയ്ത മമ്മൂട്ടി ചിത്രം ‘നന്‍പകല്‍ നേരത്ത് മയക്കം’ എന്ന ചിത്രവും ചലച്ചിത്ര മേളയില്‍ പ്രദര്‍ശിപ്പിച്ചിരുന്നു.
മമ്മൂട്ടി നായകനെത്തുന്ന ചിത്രത്തിൽ നായികയായി എത്തുന്നത് തമിഴ് നടി ജ്യോതിക ആണ്. ഒരിടവേളയ്ക്ക് ശേഷം ജ്യോതിക നായികയായി എത്തുന്ന മലയാള ചിത്രം കൂടിയാണ് കാതല്‍. ലാലു അലക്സ്, മുത്തുമണി, ചിന്നു ചാന്ദിനി, സുധി കോഴിക്കോട്, അനഘ അക്കു, ജോസി സിജോ, ആദർശ് സുകുമാരൻ തുടങ്ങിയവര്‍ ചിത്രത്തിൽ പ്രധാനവേഷത്തില്‍ അഭിനയിക്കുന്നുണ്ട്. ഛായാഗ്രഹണം സാലു കെ തോമസ് ആണ് നിര്‍വഹിക്കുന്നത്. ചിത്രത്തിനായി സംഗീതം ഒരുക്കുന്നത് മാത്യൂസ് പുളിക്കൻ ആണ്. കാതല്‍ നിര്‍മിച്ചിരിക്കുന്നത് മമ്മൂട്ടി കമ്പനിയാണ്.
അതേസമയം, മമ്മൂട്ടി നായക കഥാപാത്രത്തിൽ എത്തിയ ‘കണ്ണൂര്‍ സ്ക്വാഡ്’ എന്ന ചിത്രമാണ് ഏറ്റവും ഒടുവില്‍ പ്രദർശനത്തിന് എത്തിയത്. ഒരു യഥാര്‍ത്ഥ സംഭവത്തെ ആസ്പദമാക്കി ഒരുങ്ങിയ ചിത്രം സംവിധാനം ചെയ്തത് റോബി വര്‍ഗീസ് രാജ് ആണ്. തിരക്കഥ ഒരുക്കിയത് മുഹമ്മദ് ഷാഫിയും റോണി ഡേവിഡ് രാജും കൂടിയാണ്. ശബരീഷ് വര്‍മ, അസീസ്‍ നെടുമങ്ങാട്, വിജയ രാഘവന്‍, റോണി തുടങ്ങിയവര്‍ ചിത്രത്തില്‍ പ്രധാന കഥാപാത്രങ്ങളായി എത്തിയിരുന്നു. അധികം പ്രൊമോഷനുകൾ ഒന്നുമില്ലാതെ എത്തിയ സിനിമ ബോക്സ്ഓഫീസിൽ വമ്പൻ വിജയമാണ് നേടിക്കൊണ്ടിരിക്കുന്നത്.