ഇഷ്ടം കൊണ്ട് നിരവധിയാള്‍ക്കാര്‍ ചെയ്യുന്ന സിനിമയുടെ ഭാഗമായെന്ന് സാബുമോന്‍. പ്രാവ് സിനിമയുടെ വാര്‍ത്ത സമ്മേളനത്തിലാണ് സിനിമയെക്കുറിച്ചും നിര്‍മ്മാതാവായ രാജശേഖരനെക്കുറിച്ചും സാബുമോന്‍ മനസ് തുറന്നത്.
സാബുമോന്‍ പറഞ്ഞ വാക്കുകള്‍….
‘എല്ലാവരും വളരെ ആഗ്രഹത്തോടെയാണ് ഈ സിനിമ ചെയ്തത്. ചില സിനിമകള്‍ വളരെ പ്രൊഫഷണലായിരിക്കും അതായത് ബിസിനസ് രീതിയിായിരിക്കും പക്ഷേ ഈ സിനിമ എനിക്ക് അങ്ങനെ തോന്നിയിട്ടില്ല.
ഇഷ്ടം കൊണ്ട് നിരവധിയാള്‍ക്കാര്‍ ചെയ്ത സിനിമയാണ്. നിര്‍മ്മാതാവായ രാജശേഖരന്‍ ചേട്ടന് ബിസിനസുകാരനല്ല. രാജശേഖരന്‍ ചേട്ടന്റെ പശ്ചാത്തലം നോക്കുകയാണെങ്കില്‍ വേറൊരു മേഖലയില്‍ നിന്നാണ്. അത്തരത്തിലുള്ള ഒരു സിനിമ എടുക്കുകയാണെങ്കില്‍ ചേട്ടന് സിനിമയോടുള്ള താല്‍പ്പര്യം കൊണ്ട് മാത്രമാണ്.
കോളജ് കാലഘട്ടം മുതലേ നാടകവും കഥയെഴുത്തുമായിട്ട് മുന്നോട്ട് പോകുകയാണ്. അതു കൊണ്ട് തന്നെയാണ് പത്മരാജന്റെ ചെറുകഥയെ ആസ്പദമാക്കി സിനിമയെടുക്കാന്‍ തോന്നുന്നത്. മികച്ചൊരു കലാസൃഷ്ടിയുണ്ടാക്കിയെടുക്കുക. അങ്ങനെ ഞാനും സിനിമയുടെ ഭാഗമായി. ഞാന്‍ ഈ സിനിമയില്‍ ജോയിന്‍ ചെയ്തു. ഞാന്‍ ഈ സിനിമയുടെ ഭാഗമായതിന് ശേഷമാണ് കൊള്ളാം നല്ലതാണെന്ന് തോന്നീയത്”
അതേസമയം, ‘പ്രാവ്” സിനിമ എടുക്കണമെന്ന ആഗ്രഹവുമായി മമ്മൂക്കയെ സമീപിച്ചപ്പോള്‍ മറുപടി ലഭിച്ചില്ലെന്നും നിരന്തരം പറഞ്ഞതിന് ശേഷമാണ് അദ്ദേഹത്തിന്റെ പിന്തുണ ലഭിച്ചതെന്നും നിര്‍മ്മാതാവ് പി ആര്‍ രാജശേഖരന്‍ പറഞ്ഞു. ”മമ്മൂക്കയുടെ അടുത്ത് നേരിട്ട് സിനിമയെക്കുറിച്ച് സംസാരിക്കാന്‍ സാധിക്കില്ല.സംസാരത്തിനിടയില്‍ ഇടക്ക് പറയുന്നതാണ് നല്ലത്. കാരണം നേരിട്ട് പറഞ്ഞുകഴിഞ്ഞാല്‍ പെട്ടെന്ന് തന്നെ അതിന് മറുപടി ലഭിക്കണമെന്നില്ല. ഞാന്‍ ആദ്യം ഒരു പ്രാവശ്യം സിനിമയെക്കുറിച്ച് പറഞ്ഞപ്പോള്‍ അദ്ദേഹം അത് തമാശയായി കരുതിയത് കൊണ്ടാകാം എന്നോട് അതിനെപ്പറ്റി ഒന്നും പറഞ്ഞിരുന്നില്ല.
രണ്ടാമതും പറഞ്ഞപ്പോള്‍ എന്നോട് അദ്ദേഹം തനിക്ക് വേറെ പണിയൊന്നുമില്ല എന്നാണ് ചോദിച്ചത്. സത്യത്തില്‍ ഞാന്‍ ഈ മേഖലയില്‍ വന്ന് ബുദ്ധിമുട്ടരുത് എന്ന സ്‌നേഹം കൊണ്ടും കരുതലുകൊണ്ടുമാണ് അദ്ദേഹം എന്നോട് അന്നങ്ങനെ പറഞ്ഞത്. സിനിമ മേഖലയില്‍ എത്രമാത്രം എനിക്ക് താല്പര്യം ഉണ്ടെന്ന് അറിയുന്നതിനായി അദ്ദേഹം നടത്തിയ ടെസ്റ്റായിട്ടാണ് ഞാന്‍ അതിനെ കണ്ടത്.പിന്നീട് അത് ബോധ്യപ്പെട്ടതുകൊണ്ടായിരിക്കാം എനിക്ക് എല്ലാ പിന്തുണയും നല്‍കിയത്.
ഞാന്‍ എന്റെ തീരുമാനത്തില്‍ ഉറച്ചു നിന്നപ്പോള്‍ മമ്മൂക്ക എനിക്ക് വേണ്ട എല്ലാവിധ പ്രോത്സാഹനങ്ങളും തന്നിരുന്നു.ഇത്രയും കാലത്തിനിടയില്‍ അദ്ദേഹത്തിന് ലഭിച്ച എക്‌സ്പീരിയന്‍സില്‍ നിന്നുകൊണ്ട് എനിക്ക് വേണ്ടത്ര ഉപദേശങ്ങളും നിര്‍ദേശങ്ങളും എനിക്ക് തന്നിരുന്നു. മാത്രമല്ല അദ്ദേഹവുമായുള്ള അടുപ്പത്തില്‍ അവയെല്ലാം കൃത്യമായി പഠിക്കാനും എനിക്ക് സാധിച്ചു.
മമ്മൂക്കയുടെ പ്രകൃതം അനുസരിച്ച് എപ്പോഴും തമാശ കലര്‍ന്ന രീതിയിലാണ് അദ്ദേഹം പ്രതികരിക്കാറുള്ളത്. ഈ സിനിമയുടെ ആദ്യത്തെ പോസ്റ്റര്‍ ഓസ്ട്രേലിയയില്‍ വച്ച് അദ്ദേഹമാണ് റിലീസ് ചെയ്തത്. എനിക്ക്എപ്പോഴും ഒരുപാട് കാര്യങ്ങള്‍ അദ്ദേഹം ചെയ്ത തന്നിട്ടുണ്ട്. അതിന്റെ കടപ്പാട് എന്നും എനിക്കുണ്ടായിരിക്കും .ഈ സിനിമ വിജയിച്ചില്ലെങ്കില്‍ എനിക്ക് മമ്മൂക്കയുടെ വീട്ടില്‍ കയറാന്‍ പറ്റില്ല എന്നും നിര്‍മ്മാതാവ് പി ആര്‍ രാജശേഖരന്‍ പറയുന്നു .
പത്മരാജന്റെ വിഖ്യാതമായ ഒരു കഥയെ അവലംബമാക്കിയാണ് ‘പ്രാവ്’ എന്ന ചിത്രം ഒരുങ്ങുന്നത്. അമിത് ചക്കാലക്കല്‍, സാബുമോന്‍ അബ്ദുസമദ്, നിഷാ സാരംഗ്, ആദര്‍ശ് രാജ, അജയന്‍ തകഴി, യാമി സോന, ഡിനി ഡാനിയല്‍, ടീന സുനില്‍, ഗായത്രി നമ്പ്യാര്‍, അലീന എന്നീ താരങ്ങളെല്ലാം പ്രധാന കഥാപാത്രങ്ങളായി ചിത്രത്തില്‍ എത്തുന്നുണ്ട് . ചിത്രത്തിന്റെ ഛായാഗ്രാഹണം നിര്‍വഹിക്കുന്നത് ആന്റണി ജോ ആണ്. അനീഷ് ഗോപാല്‍ ആണ് പ്രൊഡക്ഷന്‍ ഡിസൈനര്‍ , വസ്ത്രാലങ്കാരം ചെയ്തിരിക്കുന്നത് അരുണ്‍ മനോഹറും, മേക്കപ്പ് ചെയ്തിരിക്കുന്നത് ജയന്‍ പൂങ്കുളവുമാണ്.