എന്റെ സിനിമയെക്കാള്(വര്ഷങ്ങള്ക്ക് ശേഷം) എനിക്കിഷ്ടപ്പെട്ടത് ആവേശമാണെന്ന് ധ്യാന് ശ്രീനിവാസന്. ചിത്രം ഗംഭീരമാണെന്ന് സിനിമ ഇറങ്ങുന്നതിന് മുന്പേ തന്നെ കേട്ടിരിന്നുവെന്നും അന്നങ്ങനെ പറഞ്ഞത് തമാശയ്ക്കു മാത്രമായിരുന്നുവെന്നും ധ്യാന് പറയുന്നു.പാര്ട്ണേഴ്സ് എന്ന പുതിയ സിനിമയുടെ പ്രസ്മീറ്റില് സംസാരിക്കുന്നതിനിടെയാണ് താരം ഇക്കാര്യം വെളിപ്പെടുത്തിയത്.
ഫെസ്റ്റിവല് സീസണിലാണ് നമ്മുടെ സിനിമ വരുന്നത്. അങ്ങനെയൊരു ക്ലാഷ് വരുന്ന സമയത്ത് നിങ്ങളുടെ മുന്നില് തന്നെയല്ലേ ഞാനിതൊക്കെ പറഞ്ഞുപോയത്. നമ്മള് പറയുന്നത്, ആളുകള് എങ്ങനെ എടുക്കുന്നു എന്നതും പ്രധാനമാണ്. ജിത്തു (ആവേശം സംവിധായകന്) തന്നെ അതിനു ശേഷം നല്കിയ അഭിമുഖങ്ങളില് പറയുകയുണ്ടായി, ഞാനത് പറഞ്ഞത് തമാശയ്ക്കാണെന്ന്.
ആവേശം സിനിമ ഇറങ്ങുന്നതിനു മുന്നേ നമുക്ക് അറിയാം, ആ സിനിമ എങ്ങനെ വരുമെന്നുള്ളത്. ഈ സിനിമ എത്രത്തോളം നല്ലതാണെന്നുള്ളതിന്റെ വാര്ത്തകളും നേരത്തെ കിട്ടും. ഞാനങ്ങനെ പറഞ്ഞുകൊണ്ട് ആ സിനിമയ്ക്കൊന്നും സംഭവിക്കാന് പോകുന്നില്ല.
ആ സിനിമ പുറത്തിറങ്ങി ഹിറ്റായി എന്ന ആളുകളുടെ പ്രതികരണം വന്നതിനു ശേഷമാണ് ഞാന് രാത്രിയില് പോയി തമാശയ്ക്ക് ആ പ്രതികരണം നടത്തിയത്. അതിനു മുന്നേ തന്നെ വര്ഷങ്ങള്ക്കു ശേഷത്തേക്കാള് മുകളിലാണ് ആവേശമെന്ന വാര്ത്ത വന്നു കഴിഞ്ഞു.പിന്നീട് ഉസ്താദ് ഹോട്ടല്, ചരിത്രം നമ്മള് ആവര്ത്തിക്കും എന്നൊക്കെ പറഞ്ഞത് വെറുതെ ഒരോളമുണ്ടാക്കാന് വേണ്ടി മാത്രമാണ്. എനിക്കറിയില്ലേ, ആവേശം അതിനേക്കാള് നല്ല സിനിമയാണെന്ന്.പക്ഷേ ആ സമയത്ത് എനിക്കെന്റെ സിനിമയെ താഴ്ത്തിക്കെട്ടി പറയാന് പറ്റില്ലല്ലോ? എനിക്കറിയാം വര്ഷങ്ങള്ക്കു ശേഷത്തിലെ പ്രശ്നങ്ങളൊക്കെ. ഞാന് അഭിനയിച്ചൊരു സിനിമ, അതിനോടൊപ്പം ഇറങ്ങുന്ന മറ്റൊരു സിനിമ.എനിക്കു ചിലപ്പോള് എന്റെ സിനിമയേക്കാള് ഇഷ്ടപ്പെടുന്നത് അതിന്റെ കൂടെ ഇറങ്ങിയ സിനിമയാകും. കണ്ടപ്പോള് ആവേശമാണ്, വര്ഷങ്ങള്ക്കു ശേഷത്തേക്കാള് ഇഷ്ടപ്പെട്ടത്. അത് സത്യമല്ലേ. നമ്മുടെ ടേസ്റ്റ് വ്യത്യാസം വരുന്നതില് തെറ്റില്ലല്ലോയെന്നാണ് ധ്യാന് പറഞ്ഞത്.