കഴിഞ്ഞ ദിവസം കൊച്ചി ഗോകുലം കൺവെൻഷൻ സെന്ററിൽ വെച്ച് നടന്ന മലയാളസിനിമാ താരസംഘടന അമ്മയുടെ മുപ്പതാമത് വാർഷിക പൊതുയോഗത്തിലെ താരങ്ങളുടെ ഗാരങ്ങൾ ഏറെ ശ്രദ്ധ നേടിയിരുന്നു. രാവിലെയുള്ള വോട്ടിങ്ങിനും അവാർഡ് ദാന ചടങ്ങുകളും ഒക്കെ കഴിഞ്ഞ് ഉച്ചഭക്ഷണത്തിനും ശേഷമായിരുന്നു താരങ്ങളുടെ കലാപരിപാടികൾ. വലിയ വിപുലമായി ഒന്നുമല്ലെങ്കിലും സിനിമാതാരങ്ങൾ ഗാനമാലപിച്ചിരുന്നു. അതിൽ അംഗങ്ങളെ ആവേശം കൊള്ളിച്ച ഗാനമായിരുന്നു നടൻ ഭീമൻ രഘുവിന്റേത്. ഇന്നസെന്റും ജഗതിയും വേഷമിട്ട കാബൂളിവാല എന്ന ചിത്രത്തിലെ പാൽനിലാവിനും ഒരു നൊമ്പരം എന്ന പാട്ടാണ് ഭീമൻ രഘു പാടിയത്.
താരത്തിന്റെ പാട്ട് പിന്നീടങ്ങോട്ട് അമ്മയിലെ അംഗങ്ങളും ഏറ്റെടുക്കുകയായിരുന്നു. രമേഷ് പിശാരടി, രചന നാരായണൻകുട്ടി, പ്രസീത, ദേവി ചന്ദന തുടങ്ങി സദസ്സിലിരിക്കുന്ന ഒട്ടുമിക്ക താരങ്ങളും ഗാനം ഏറ്റുപാടുകയായിരുന്നു. ഭീമൻ രഘുവിനോട് വീണ്ടും ആ ഗാനം പാടാൻ ആവിശ്യപ്പെടുന്നുമുണ്ട്. കൂടാതെ അമ്മയുടെ മീറ്റിങ്ങിൽ പങ്കെടുക്കാനും, വേദിയിൽ വന്ന് സംസാരിക്കാനുമൊക്കെ വഴിയൊരുക്കിത്തന്ന പ്രസിഡന്റ് മോഹൻലാലുൾപ്പെടെയുള്ളവർക്ക് അദ്ദേഹം നന്ദിയും അറിയിച്ചു. അമ്മയുടെ മീറ്റിങ്ങിൽ പങ്കെടുക്കാൻ നടനും, കേന്ദ്ര സഹ മന്ത്രിയുമായ സുരേഷ് ഗോപി എത്തിയതിലും വലിയ സന്തോഷമുണ്ടെന്ന് അദ്ദേഹം പറഞ്ഞു. അമ്മ താര സംഘടനയുടെ അഭിമാനം തന്നെയാണ് സുരേഷ് ഗോപിയും കൂടാതെ നടനും മന്ത്രിയുമായ ഗണേഷ് കുമാറുമെന്നും അദ്ദേഹം കൂട്ടിച്ചേത്തു.
അമ്മ താര സംഘടനയുടെ മുപ്പതാമത് വാർഷിക പൊതുയോഗം എന്നിതിനേക്കാൾ പത്താമത്തെ തെരഞ്ഞെടുപ്പ് നടക്കുന്ന പൊതുയോഗം എന്നതായിരുന്നു ഇന്നലെത്തെ മീറ്റിങ്ങിന്റെ ഏറ്റവും വലിയ പ്രത്യേകത. പഴയ ഭരണസമിതി അധികാരമൊഴിയുകയും പുതിയ ഭരണസമിതി അധികാരത്തിൽ വരികയും ചെയ്തു. മോഹൻലാൽ തന്നെയാണ് മൂന്നാം തവണയും പ്രസിഡന്റ് സ്ഥാനത്ത് വരുന്നത്. എതിരില്ലാതെയാണ് അദ്ദേഹം ആ സ്ഥാനത്തേക്ക് തെരഞ്ഞെടുക്കപ്പെട്ടത്. ഉണ്ണി മുകുന്ദനും ട്രഷറർ സ്ഥാനത്തേക്ക് എതിരില്ലാതെയാണ് തെരഞ്ഞെടുക്കപ്പെട്ടത്. ജനറൽ സെക്രട്ട്രറി സ്ഥാനത്ത് നടൻ സിദ്ദിഖാണ് തെരഞ്ഞെടുപ്പിൽ വിജയിച്ചത്.
കൂടാതെ ഏറ്റവും കൂടുതൽ മത്സരം നടന്ന വെെസ് പ്രസിഡന്റ് സ്ഥാനത്തേക്ക് മത്സരിച്ച് ജയിച്ചത് നടൻ ജഗദീഷും, നടൻ ജയൻ ചേർത്തലയുമാണ്. ജോയന്റ് സെക്രട്ട്രറിയായി മത്സരിച്ച് ജയിച്ചത് നടൻ ബാബുരാജ് ആണ്. അതേസമയം, അമ്മയുടെ എക്സിക്യൂട്ടീവ് കമ്മിറ്റി മെമ്പേർസ് ആയി തിരഞ്ഞെടുക്കപ്പെട്ടത് പത്ത് പേരാണ്. കലാഭവൻ ഷാജോൺ, സുരാജ് വെഞ്ഞാറമൂട് , ജോയ് മാത്യു, സുരേഷ് കൃഷ്ണ, അനന്യ, ടിനി ടോം, വിനു മോഹൻ, ടോവിനോ തോമസ്, സരയു മോഹൻ, അൻസിബ എന്നിവരാണ്. പതിനൊന്നാമത്തെ ആളെ പുതിയ എക്സിക്യൂട്ടീവ് യോഗത്തിൽ തെരഞ്ഞെടുക്കുമെന്നാണ് തീരുമാനം.