തെന്നിന്ത്യൻ നടൻ ധനുഷ് ഒരേ സമയം സംവിധാനം ചെയ്യുകയും അഭിനയിക്കുകയും ചെയ്യുന്ന സിനിമയെന്ന പ്രത്യേകതയിൽ ഏറെ ശ്രദ്ധിക്കപ്പെട്ട ചിത്രമാണ് അദ്ദേഹത്തിന്റെ അൻപതാമത്തെ സിനിമ. പ്രഖ്യാപനം മുതൽ തന്നെ അതിന്റെ ഓരോ അപ്‌ഡേറ്റുകൾക്കും വലിയ സ്വീകാര്യതയാണ് ലഭിക്കാറുള്ളത്. ചിത്രത്തിന്റെ പേര് മുൻപ് പുറത്തുവിട്ടിരുന്നു. ‘രായൻ’ എന്ന് പേരിട്ട ചിത്രത്തിലെ അപർണ്ണയുടെ ലുക്ക് പുറത്തുവിട്ടിരിക്കുകയാണ് അണിയറക്കാർ ഇപ്പോൾ.
ബ്ലാക്ക് ആൻഡ് വെെറ്റ് പശ്ചാത്തലത്തിലാണ് അപർണ്ണയുടെ ചിത്രമെത്തിയത്. അപർണ്ണ ബാലമുരളിയെന്ന പ്രതിഭ എന്നാണ് ധനുഷ് ചിത്രത്തിന് നൽകിയ ക്യാപ്ഷൻ. വളരെ ശക്തമായ ഒരു കഥാപാത്രത്തെയായിരിക്കും താരം അവതരിപ്പിക്കുക എന്നാണ് പോസ്റ്റർ നൽകുന്ന സൂചനകൾ. ധനുഷിന്റെ അമ്പതാം ചിത്രമായൊരുങ്ങുന്ന രായന്റെ തിരക്കഥയും സംവിധാനവും അദ്ദേഹം തന്നെയാണ് ചെയ്യുന്നത്.
സൺ പിക്ചേഴ്സിന്റെ ബാനറിൽ കലാനിധി മാരനാണ് ചിത്രം നിർമിക്കുന്നത്. രായന്റെ ഫസ്റ്റ്ലുക്ക് പോസ്റ്റർ മുൻപ് നിർമാതാക്കൾ പുറത്തുവിട്ടിരുന്നു. ഇതുവരെ കാണാത്ത ഒരു ലുക്കിലാണ് ധനുഷ് ചിത്രത്തിലെത്തുന്നത്. ആക്ഷൻ പശ്ചാത്തലത്തിലായിരിക്കും ചിത്രമൊരുങ്ങുക എന്ന സൂചനയും പുറത്തിറങ്ങിയ പോസ്റ്റർ നൽകുന്നുണ്ട്. കാളിദാസ് ജയറാമും സുന്ദീപ് കിഷനുമാണ് മറ്റുപ്രധാനവേഷങ്ങളിൽ അഭിനയിക്കുന്നത്. ഇരുവരെയും പോസ്റ്ററിൽ കാണാം.
എ.ആർ. റഹ്മാനാണ് ചിത്രത്തിൽ സംഗീത സംവിധാനം നിർവഹിക്കുന്നത്. ഓം പ്രകാശ് ഛായാഗ്രഹണവും നിർവഹിക്കുന്നുണ്ട്. പീറ്റർ ഹെയ്ൻആണ് സംഘട്ടന സംവിധാനം ചെയ്യുന്നത്. ശ്രേയസ് ശ്രീനിവാസനാണ് എക്സിക്യൂട്ടീവ് പ്രൊഡ്യൂസർ ആയെത്തുന്നത്. കഴിഞ്ഞവർഷം ജൂലായിലാണ് സിനിമയുടെ ചിത്രീകരണം ആരംഭിച്ചിരുന്നത്. ധനുഷിന്റെ മൂന്നാമത്തെ സംവിധാന സംരംഭമാണ് രായൻ. 2017-ൽ പുറത്തിറങ്ങിയ പാ പാണ്ടിയാണ് ധനുഷ് ആദ്യം സംവിധാനം ചെയ്ത ചിത്രം. മലയാളിതാരങ്ങളായ മാത്യു തോമസ്, അനിഖാ സുരേന്ദ്രൻ, പ്രിയാ വാര്യർ എന്നിവർ മുഖ്യവേഷങ്ങളിലെത്തുന്ന നിലവുക്ക് എൻമേൽ എന്നടീ കോപം എന്ന ചിത്രവും ധനുഷ് പിന്നീട് സംവിധാനം ചെയ്യുന്നുണ്ട്. ഇതിന്റെ തിരക്കഥയും ധനുഷിന്റേത് തന്നെയാണ്.
അതേസമയം ധനുഷിന്റേതായി ഏറ്റവും അവസാനം പുറത്തിറങ്ങിയ ചിത്രം ‘ക്യാപ്റ്റൻ മില്ലർ’ ആണ്. വളരെയധികം മികച്ച പ്രതികരണങ്ങളാണ് ചിത്രത്തിന് ലഭിച്ചത്. പ്രകടനംകൊണ്ട് എന്നും ആരാധകർക്ക് വിസ്മയം കാഴ്ചവെക്കുന്ന താരം കൂടിയാണ് ധനുഷ്, ആ പതിവ് ഇത്തവണയും തെറ്റിച്ചിട്ടില്ല. ചിത്രം സംവിധാനം ചെയ്തത് അരുണ്‍ മതേശ്വരനാണ്. ധനുഷ് നായകനായെത്തിയ ക്യാപ്റ്റൻ മില്ലര്‍ ചിത്രത്തില്‍ നായികയായി എത്തിയത് പ്രിയങ്ക അരുള്‍ മോഹൻ ആണ്.