ജീവിതത്തിലെ വലിയ ആഗ്രഹം സാധിച്ച സന്തോഷത്തിലാണ് നടി ശ്രുതി ജയന്‍. അസുഖത്തോടെ ജനിച്ച നടിയുടെ സഹോദരന് ഏറ്റവും ഇഷ്ടമുള്ള രണ്ട് വ്യക്തികളായിരുന്നു മോഹന്‍ലാലും സച്ചിനും. അവന്‍ മരിച്ച് 11 വര്‍ഷങ്ങള്‍ക്കു ശേഷം അവന്റെ എല്ലാമെല്ലാമായ മോഹന്‍ലാലിനെ കണ്ട സന്തോഷത്തിലാണ് ശ്രുതിയും അമ്മയും.അമ്മയിലൂടെ ആ സാനിധ്യം അവന്‍ അറിഞ്ഞിട്ടുണ്ടാകും എന്നാണ് ശ്രുതി എഴുതിയിരിക്കുന്നത്.
ശ്രുതിയുടെ വാക്കുകളിലേക്ക്
‘അമ്മയുടെ ഏറ്റവും വലിയ ആഗ്രഹങ്ങളില്‍ ഒന്നായിരുന്നു ലാലേട്ടനെ കാണുക അതിലുപരി എന്റെ അമ്ബൂന്റെയും. ..( എന്റെ കുഞ്ഞനിയന്‍ )സെറിബ്രല്‍ പാല്‍സി ഓട് കൂടി ജനിച്ച അവനു ഏറ്റവും ഇഷ്ടമുള്ള 2 വ്യക്തികളായിരുന്നു ലാലേട്ടനും സച്ചിന്‍ തെണ്ടുല്‍ക്കറും….
ലാലേട്ടന്റെ എല്ലാ സിനിമകളും തീയേറ്ററില്‍ കൊണ്ട് പോയി അവനെ കാണിക്കുമായിരുന്നു…
ലാലേട്ടനെ കാണുമ്പോള്‍ അവന്‍ പ്രകടമാകുന്ന സന്തോഷം പറഞ്ഞറിയിക്കാന്‍ സാധിക്കില്ല…
മോഹന്‍ലാല്‍ എന്ന നടനുപരി അവന്റെ സ്വന്തം ആരോ ആയിരുന്നു ലാലേട്ടന്‍. ..
ജീവിച്ചിരിക്കുന്ന കാലമത്രയും ലാലേട്ടനും അവന്റെ കൂടെ തന്നെ ഉണ്ടായിരുന്നു.
അമ്മയാണ് നാനാ മാഗസിനിലൂടെയും ടീവിയിലും മറ്റും കാണിച്ച് ലാലേട്ടന്‍ എന്ന മഹാ പ്രതിഭയെ എന്റെ അനിയന്റെ ഉള്ളില്‍ നിറച്ചത്. ..അവനെ കൊണ്ടുപോയി ലാലേട്ടനെ കാണിക്കണമെന്നായിരുന്നു ഞങ്ങളുടെ ശ്രമം, പക്ഷെ അന്ന് അത് നടന്നില്ല. .അമ്പു ഞങ്ങളെ വിട്ടു പിരിഞ്ഞു 11 വര്‍ഷം ആയി..ഈ കഴിഞ്ഞ അടുത്ത ദിവസമാണ് അവന്റെ ആ ആഗ്രഹം സാധിച്ചത്. ..എന്റെ അമ്മയിലൂടെ ആ സാനിധ്യം അവന്‍ അറിഞ്ഞിട്ടുണ്ടാകും. ..
നന്ദി ലാലേട്ടാ പ്രിയപ്പെട്ട രാം ജി ള്‍ നന്ദി. ..എല്ലാത്തിനും’,-ശ്രുതി ജയന്‍ കുറിച്ചു.
വളരെ ചുരുങ്ങിയ സിനിമകള്‍ കൊണ്ട് തന്നെ പ്രേക്ഷകരുടെ ശ്രദ്ധ നേടിയ അഭിനേത്രിയാണ് ശ്രുതി ജയന്‍. സിനിമകള്‍ക്ക് പുറമെ വെബ് സീരീസുകളിലും ശ്രുതി സാന്നിധ്യം അറിയിച്ചിട്ടുണ്ട്. അടുത്തിടെ കൊറോണ ധവാന്‍ എന്ന സിനിമയിലൂടെ നായികയായും ശ്രുതി തിളങ്ങിയിരുന്നു. ചിത്രത്തിലെ ശ്രുതിയുടെ പ്രകടനം കയ്യടി നേടുകയും ചെയ്തു. ജീവിതത്തില്‍ വലിയ വിഷമങ്ങളിലൂടെ കടന്നു പോകേണ്ടി വന്നിട്ടുണ്ട് ശ്രുതിക്ക്.
അച്ഛന്റെയും അനുജന്റെയും മരണമാണ് ശ്രുതിയെ തളര്‍ത്തിയത്. അവരുടെ വിയോഗത്തിന് ശേഷമുള്ള ജീവിതത്തെ കുറിച്ചൊക്കെ ശ്രുതി മുന്‍പ് സംസാരിച്ചിട്ടുണ്ട്. ലിജോ ജോസ് പെല്ലിശ്ശേരിയുടെ അങ്കമാലി ഡയറീസിലൂടെ ആയിരുന്നു ശ്രുതിയുടെ സിനിമാ അരങ്ങേറ്റം. പിന്നീട് പൈപ്പിന്‍ ചുവട്ടിലെ പ്രണയം, നിത്യഹരിത നായകന്‍, ജൂണ്‍, സത്യം പറഞ്ഞാല്‍ വിശ്വാസിക്കുമോ? എന്നിങ്ങനെ ഒരുപിടി സിനിമകളിലൂടെ തന്റേതായ ഒരിടം കണ്ടെത്തുകയായിരുന്നു. കൊറോണ ധവാനിലാണ് ശ്രുതി അവസാനം അഭിനയിച്ചത്. നാഗ ചൈതന്യ നായകനായ ദൂത എന്ന തെലുങ്ക് വെബ് സീരിസിലും ശ്രുതി ഒരു പ്രധാന വേഷത്തില്‍ അഭിനയിച്ചിട്ടുണ്ട്. മഹാറാണിയെന്ന സിനിമയിലാണ് അവസാനം അഭിനയിച്ചത്.